何秀蘭建議西九搞神功戲

(明報)1月14日 星期三 05:05

【明報專訊】西九管理局已開工，為呢個成200幾億嘅項目做準備，立法會 亦成立咗一個對口小組監察同跟進。小組噚日第一次開會，唔少議員都批評西九項目進度好慢，西九龍文化區幅地要丟空成10年，真係好嘥，又認為即使西九硬件未起好，政府都要推廣軟件，例如提升市民對文化、藝術方面嘅興趣。

其實Emily覺得噚日議員唔少建議都好有創意，例如獨立議員何秀蘭 ， 佢覺得幅地擺喺度唔用，倒不如將現時有文化特色嘅活動，搬去嗰度搞。阿Cyd建議，工展會、年宵都好有香港特色，不如將呢啲一年一度嘅活動搬晒去西九塊空 地度搞。佢又話，每年盂蘭節都會搞神功戲，都屬於本土文化，其實都可以喺西九搞，總之要用唔同方法，提升喺軟件方面嘅推廣。

林大輝﹕應加卡拉OK

而工業界（二）林大輝就話，覺得文化係好深、好抽象嘅事，睇完管理局成員名單後，擔心西九建好時，淨係會有好高尚嘅藝術表演，平衡唔到中下階層嘅喜好。

大輝建議，應該要加啲本土文化入西九項目，照顧中下階層需要，例如喺西九開設卡拉OK，讓所有人都可以參與。

大輝哥﹐如果我係中下階層﹐
首先﹐有錢我都儲起佢啦﹐飯都冇得食﹐仲點唱k
其次﹐落樓下社區中心免費唱唔好﹐要走到去到西九唱k﹐

唔知你係貪佢食風丫﹐定係貪佢夠僻靜呢?

只要規劃得恰當﹐所有人都能樂在其中﹐並不存在高尚/低俗的藝術。
西九的原意也應該是開闢一個可以讓所有市民享受的地方。